Luke 21

1Niya eibono Yesu shide ette wolo huwo hasamak illafa leiti huma hisorita inno hosie do lo tunari. 2Ette inyeja wolo nabo ihidak no ŋorwo hettehihitani lefiyak arobia illo lomuta lohorik. Niya ejo inyeja, 3“Ajo naŋ da hatai dede hijo aŋafiyak hettehitani innaŋ ihidak inno loluŋ agalik isieja bidaŋ. Eisiara hulloŋ bidaŋ hisiorita inno hossie tere he hirro inno loluŋa do hosie. 4Hati aŋaisiere ihidak hettehitani to hiji he hirat, hisso arobia daŋ illo lowon do honyie illafa lamanyari inyie.”

5Hati eroita hilak te hiram tane Haji Imojit na hitok hijo eibuiye huwo tomoru te inne lelibo ojo te hisorita, lojo Yesu. 6“Hati de hirro hunna liwolo itai, afanu iso hunak holoŋi inno lobe lobo morwo larrasa wuanai de hide holobo obe leitifelihinin afau.”

7Niya eifi inyeja, hijo, “haitiyenani, annu iso leidoŋ hirro inneŋ” hara iso hifuhuti ne hirro inne nyo iso leijo isieja eifanu hidoŋŋ?“ 8Ette Yesu hitiraŋ, “Itihuma wuana he tenyia liruk hinyoba. Nyo afanu iso iluluŋ to fure hanaŋ hijo, ‘Ara naŋ inyie; “Eiliha holoŋ nyieŋ Ibaŋa leijufutak halujin inno 9hosie. Lijo itai letiri iremiti ojo ŋolofa ibaŋa libaŋ, nyo anyar leiriamik hirro inne hidoŋ ahosiere. Hati obe iso hicuŋi leidoŋ kokwak.”

10Niya ette inyeja hijo do hosie, “Eiyialari iso doŋe nabo, ojo lobie nabo eiyialari nabo lobie. 11Hati owon iso ikebehi inne itoho, ojo da maisiak lolufa owuon iso hiŋa ojo hitigiemita. Owon iso hiro hunaŋ leriamu hitibaŋa ojo hitihututa te ido.

12Hati olobe hirro inne bidaŋ, etiorok iso isieja has inno hosie do hoi ette hitigiema iyie, eisiere iyie asynaguage ojo ababus, eiyari inyie ahosiere ha habusi ojo da mamuri to fure hanaŋ. 13Eriamik iso ne hirra do honyie ikoi ne leriamihini inyeja ŋaituhutari.

14Etihumak da tajia hatai elenyia leitihumak higierita inna hati ahosiere elehenyia holoŋ nyie lottubai. 15Hati aisiere iso naŋ do hoi hitiriamita ojo lofioroho, inno lobe hemumunak leriamik ŋaiheru, kuya hitibahas.

16Hati iriamik iso iyie ŋaitiluahini kuya hilahaŋ hoi, harasira, woyo, ojo morot, ojo iso isieja hilak illa hatai ottohoi. 17Eyalari iso huwo daŋ to fure tana naŋ. 18Hati obe iso lobo hofiti lohono hoi leyei. 19Ta ŋadihak to no hoi ifotu iso inyie loyirihien innohoi.

20Lijo litai liwolo Yerusalem aŋaikolohini teleseger, anyar leyen hijo eliaha hitihara. 21Niya isiere luhe to Yuda eirwette adoŋiok, ojo isiere luhe te hijo ho bore gala eifie, ibaŋa hidofe leisiere luhe todoŋiok lejiŋu abore gala. 22Nyo ara iso inne holoŋi hinnerita, hijo anyar honyie leituhutehini hirro innafa leigioro daŋ.

23Orru iso no do holoŋi da haibuŋutak ojo do nuhe leitinnaha! Nyo owuon iso hijiriŋa ne leimeta no dafau he hitigema do huwo ille. 24Ottohoi iso hilak te demi ojo hillak einnefari adoŋiok daŋ, eididenŋa iso Gentail Yerusalem many ottubari holoŋi inne Gentail de.

25Owon iso hituhutita do holoŋ ojo da hahier. Ojo da fau, owuon iso hijiriŋa do doŋiok, te huworo ta na hari na hitok ojo te hifoliahita na hari. 26Hati owuon iso huwo illo lo huyuta lokwai lokwai tabaŋi ojo to wahan ne hirro nuhe lafanu afau. Nyo eitadiho iso igoliti inne ido.

27Hati owolo iso isieja Leny tihoni lottu te itiran ho golon ojo te hitahwo ne hilohitok no lobie no Hollum. 28Ojo leitiara hirro inne hidoŋ, itidotoi ahide, itikaf hosi innahatai ahide, nyo eiliaha haitilwahak hatai.“

29Eilimak Yesu do hosie hitiriami, “Itiriŋai a yani haŋabori, ojo de yani daŋ. 30Hati lejo itai lewolo fara inno yani losidu, iremu iso itai hamai hiyen hijo eiliha iso ta has. 31Hidofe niya, lewolo itai hirro iyya inne leidoŋita, iyen itai hijo eiliha lobie no Hollum.

32Dede, ajo naŋ da hatai, hijo inya lahajihe innaŋ lottuho, many eido hirro hunaŋ daŋ. 33Ottuho iso ido ojo fau, hati obe iso rori illa naŋ lottuho.

34Hati ituhumak hiriria kwaite inna hatai, nyo hettenya tajia inna hatai leigigillo te hibunyuta, rumai, he hilafuho no manya. Hati ottu iso far nyie hiyif itai iya illohit. 35Hati ottu iso do huwo illa lamanya de hide ha fau daŋ.

36Hati anyar leduloi hiriria holoŋi daŋ, mojo hijo eriamik honyie iyie golon te hilunya hirro nuhe lafanu hidoŋ, owoita iso do hosiere he Lenyi tihoni.”

37Do holoŋi innafa leitiyanari inyeja de ikelesia ojo ta harie owu inyeja ade, leferie adoŋe Olifeto. Aŋafanu huwo daŋ ŋaiwanyu do honyie tomoite ahaji lomojori na hitok hijo eifanu hitira do honyie.

38